Iskwater ako

Mga alas siyete kan sarong banggui, may bigla na lang nagburulyawan sa luwas. Basta baga nadangog ko na sana "Ipapulis pa nindo ako" sabay nagralagatakan ang garo nagkaparasa na baso. Kan sinundan nya man na banggui duwang lalakeng burat man ang nagporormahan tapos inarawat man sana kan mga kapwa lasngag. Kansuudma man, sarong teenager na nagboboard sa likudan mi ang nagsuicide, naginom nin pahingurag na anti-bacterial. Broken hearted daa, sayang magayon pa naman. Maray sana ta dae man nadagusan.

Ini ang San Miguel sa Santa Cruz.

Street man daa an samong looban. Dae man ngani maapod na street ta motorsiklo na sana ang nakakalaog one way pa. Sa sobrang sadit kan looban garo na kami nagbuburuya pag naglalaog o luwas sa dalan. Dapat kaini interior sana, garo laog kan rida, ta sadit man na maray, mini ang size.

Typikal ang samong looban. Aga pa lang yaon na sa may atubangan kan sari-sari store si Bugoy na kapot ang sarong litrong Red Horse. Mayong baso, diretsong um-om, alas siyete pa sana nin aga. Ang mga babae man kung dae nagtsitsirismisan habang nagpapasuso nin mga aki ninda, garo mga mathematician na grabe ang intellectual discussion tungkol sa reading sa jueteng. Dae pa digdi kabali ang mga aki na mayong karikarigos na abang kulit na naghahapot kung mapaapon ka na kan basura nindo o kung pwedeng maka-arbor nin piso.

Maogma na maribok ang samong lugar. Normal na ang mga nabuburulyawan na mga magagom, mga kataid na nagpapakurusugan nin radyo saka mga burat na nagdadaraklagan bote. Kumbaga sa Pinoy movie garo setting sa pelikula ni Philip Salvador sa Joe Pring.

Pero gaano man ini karibok o kagulo, dae ko ipapadaog ang lugar na ini. Didgi naimmortalize ang mga vandal sa lanob na arog kan:

"By the power of my imagination, I will destroy your virginity"
"Don't fuck the fuckers, coz if you fuck the fuckers, the fuckers will fuck you."
"I hate vandalism, but God said, 'Love your enemies', so, I love vandalism."

Ang San Miguel man ang nagpakusog kan boot ko. Dae na ako takot sa medyo delikadong lugar, aram ko na ang gigibohon. Tipong lakaw na mapakumbaba, ang dungo nasa dalan, luway luway sana ta baka mapagkamalan na maton. Sabay pag may nangikil, bunot tulos sabay tao maski singko na sana ang nasa bulsa.

Kung kaipuhan mo man maski anong second hand, cellphone maski anong tatak, o kaya imported nasapatos, o maski mga electric fan, halat halat ka sana ta may marani na sana saimong tambay. Yaon diyan si nangangaipo nin panginom kaya pinapabakal na sana nin 400 ang electric fan, o kaya man si may paryentes na nagpadara nin package tapos mayo man nin gagamitan kan Italian shoes (nakabakal ako 500 lang) tapos siyempre si nakahabon nin latest model nin Nokia.

Ini ang samong lugar. Dakul na dikit ang pagbabago. Si mga kababata ko na mga siga kadto, siga pa man giraray, pero may mga hanapbuhay naman.

Kan sarong aldaw ngani nagsakay akong padyak pauli, nabigla ako ta nagpundo na sana sa looban. Eu palan ta si Alden ang nagpapasada. Gwapito man kadto, ang bata Atenista, mala nagpusaw na ang kaputian ta nagkakayod na sana. Naremalaso lugod si diyes pesos ko ata singko lang dapat ang bayad. Masupog man kaya.

Si Marlon man na eu ang pinakamagulang ming kasurog sa inter-zone basketball, nagpinatal. Tigsnatahcan ang sarong mukhang momong na estudyante sa Cathedral. Ang dae nya aram runner palan to sa track and field. mala Barlin pa sana nahabol na sya, naguli baga bugbog sarado pagkatapos ma-piyansyahan. Duwa naman kaya ang aki, mayo pa nin trabaho ang mag-agom. Makiherak man hade?

Eh tano ta yaon pa ako digdi? Masakit magsuway, saka boring man sa ibang lugar. Maski gustuhon ko naman maghale, mau pa man sagtak, saka for shure, mamimiss ko ang drama kan lugar. Kaya ngani binoblog ko na bago pa maglipas sa utak ko. Ang pook San Miguel, Sta Cruz Proper, Naga City, 4400.